बाँके । लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको उपाधि विभागीय टोली सशस्त्र प्रहरीको एपीएफ क्लबले जितेको छ ।
फाइनल खेलमा विभागीय टोली नेपाल पुलिस क्लबलाई १–० गोल अन्तरले पराजित गर्दै एपीएफले उपाधि हात पारेको हो ।
शुक्रबार नेपालगञ्ज रङ्गशालामा भएको खेलमा एपीएफले पुलिसलाई अन्तिम समयमा एक गोल गरेर स्तब्ध बनाएको हो । एपीएफका तर्फबाट खेलाडी गीता रानाले एक मात्र निर्णायक गोल गरिन् । राना फाइनलको प्लेयर अफ द म्याच भइन् ।
एपीएफले नगद पाँच लाख ५ हजार ५५५ रुपैयाँ सहित ट्रफि पायो । उपविजेता बनेको पुलिसले नगद दुई लाख ५० हजार रुपैयाँ सहित ट्रफिमा चित्त बुझायो ।
प्रतियोगिताको उत्कृष्ट खेलाडी एपीएफकी कप्तान अनिता बस्नेत घोषित हुँदै नगद २५ हजार रुपैयाँ प्राप्त गरिन् ।
अन्य व्यक्तिगत विधातर्फ पुलिसकी उषानाथ उत्कृष्ट गोलकिपर, एपिएफकी गिता राना उत्कृष्ट डिफेन्डर, सरु लिम्बू उत्कृष्ट मिडफिल्डर, अनिता केसी उत्कृष्ट फरवार्ड र भगवती थापा उत्कृष्ट प्रशिक्षक घोषित भइन् । उत्कृष्टले समान १० हजार रुपैयाँ प्राप्त गरे ।
बैशाख ५ गतेदेखि सुरु भएको प्रतियोगितामा नेपाल र भारतका आठ टिमको सहभागिता थियो ।
