बुद्धशान्ति । एन्फा रेफ्री स्वर्गीय लोकराज ढुंगाना स्मृति च्यालेन्ज कप नकआउट फुटबल प्रतियोगिताको उपाधि ध्रुवतारा स्पोर्टिङ क्लब दमकले जितेको छ ।
शनिबार सम्पन्न फाइनल खेलमा राजगढ फुटबल क्लबलाई शून्यका विरुद्ध १ गोल गर्दै ध्रुवतारा उपाधि हात पार्न सफल भएको हो । ध्रुवताराको लागि सक्सेस राईले गरेको एक मात्र गोल खेलको निर्णायक गोल बन्यो ।
विजेता ध्रुवताराले उपाधिसँगै नगद ७० हजार रुपैयाँ सहित ट्रफी र मेडल हात पार्यो भने उपविजेता राजगढले नगद ४० हजार रुपैयाँ सहित ट्रफी र मेडलमा चित्त बुझायो ।
फाइनल खेलको म्यान अफ द म्याच राजगढका श्याम मुर्मु भए ।
व्यक्तिगत विधातर्फ उत्कृष्ट गोलरक्षक ध्रुवताराका आयुस लिब्बु बन्दा उत्कृष्ट डिफेन्डर ध्रुवतारा कै रोशन धिमाल भए । उत्कृष्ट मिडफिल्डर राजगढका पवन मास्के चुनिए । सर्वाधिक गोलकर्ता विजेताको टिमको सक्सेस राई भए भने उदीयमान खेलाडी आयोजक आदर्श युवा क्लबका सुजन मगर भए । त्यस्तै, प्रतियोगिताका सर्वोत्कृष्ट खेलाडी विजेता टिमका प्रबिन राई घोषित भए ।
प्रतियोगिताका विजेता तथा उपविजेतालाई समापन कार्यक्रमका प्रमुख अतिथि नेपाल फुटबल रेफ्रि संघ केन्द्रीय उपाध्यक्ष मधुसुदन खनाल, झापा जिल्ला जिल्ला फुटबल संघका अध्यक्ष भगिरथ आले मामा लगायतले पुरस्कार वितरण गरेका थिए ।
