माइजोगमाई । तेस्रो माइजोगमाई अध्यक्ष कपको फाइनलमा देउमाई नगरपालिका र माङसेबुङ गाउँपालिकाबिच उपाधि भिडन्त हुने भएको छ ।
मंगलबार सम्पन्न दोस्रो सेमि फाइनल खेलमा आयोजकलाई ३–१ गोल अन्तरले पराजित गर्दै देउमाई फाइनल प्रवेश गरेको हो ।
पहिलो हाफको १०औं मिनेटमा हेम राईले गोल गर्दै देउमाईलाई अग्रता दिलाएका थिए । पहिलो हाफमा एक गोलको अग्रता बनाएको देउमाईले दोस्रो हाफको ९औं मिनेटमा मुकेश मगर र १४औं मिनेटमा किरण मगरको गोलबाट अग्रता बढाए ।
आयोजक माइजोगमाईका लागि इन्जुरी समयमा जुयल राईले सान्त्वना गोल फर्काए ।
इलामका १० वटै स्थानीय तह सहभागी प्रतियोगिताको फाइनल वैशाख ३१ मा हुनेछ । पहिलो सेमिफाइनल खेलमा माईनगरपालिकालाई २–० गोल अन्तरले पराजित गर्दै माङसेबुङ फाइनल पुगेको थियो ।
माइजोगमाई गाउँपालिकाको पूर्ण आर्थिक सहयोग तथा माइजोगमाई खेलकुद विकास परिषदको आयोजनामा भएको प्रतियोगिताकोविजेता टिमले नगद २ लाख १ हजार १ सय ११ रुपैयाँ सहित ट्रफी, मेडल र प्रमाणपत्र प्राप्त गर्नेछ । उपविजेताले नगद १ लाख ३१ हजार१ सय ११ रुपैयाँ सहित ट्रफी, मेडल र प्रमाणपत्र पाउनेछन् ।
