पाराबारी । झापाको पाराबारीमा सम्पन्न चौथो पाराबारी अन्तरपालिका भलिबल प्रतियोगिताको आय–व्यय सार्वजनिक गरिएको छ ।
गत जेठ २१ देखि २३ गते सम्म सञ्चालन भएको प्रतियोगिताको पत्रकार सम्मेलन गरि हिसाब सार्वजनिक गरिएको हो ।
पाराबारी बजार व्यवस्थापन समिति र ३ नम्बर वडा खेलकुद विकास समितिको संयुक्त आयोजनामा प्रतियोगिता सञ्चालन भएको थियो।
सम्मेलनमा खेल संयोजक लासाङ दोर्जे तामाङले दुई लाख ७४ हजार ६ सय ६५ रुपैयाँ बराबरको हिसाब प्रस्तुत गरेका थिए । उनले दाताहरुबाट एक लाख ३८ हजार ५ सय ७५ रुपैयाँ संकलन भएको र बाँकी नगरपालिका कार्यलयबाट एक लाख ३ नम्बर वडा कार्यलयबाट ६४ हजार कर सहित रकम प्राप्त भएको जानकारी गराए ।
यस प्रतियोगितामा आय र व्यय बराबार भएकोले बचत भने गर्न नसकिएको आयोजकले बताए ।
झापाको १० टिम र मोरङको २ टिम गरि १२ वटा पालिकाहरुका टिमको सहभागिता रहेको प्रतियोगिताको विजेताले ५० हजार र उपविजेताले ३० हजार सहित मेडल ट्रफी र प्रमाणपत्र हात पारेका थिए ।
प्रतियोगिताको उपाधी कन्काई नगरपालिकाले जित्यो भने शिवसताक्षी उपविजेतामा सिमित रहेको थियो ।
स्वास्थ्यको लागि खेलकुद राष्ट्रको लागि खेलकुद भन्ने मुल नारा सहित संचालन भएको यस प्रतियोगिताले पाराबारीको पहिचानलाई भलिबल संग जोड्ने काम समेत गर्ने गरेको आयोजक समितिका अध्यक्ष मेगराज ओझाले बताए ।
