दमक । दमक उद्योग वाणिज्य संघको ३५औं वार्षिकोत्सव तथा स्थापना दिवसको अवसरमा आयोजित तेस्रो उद्योग वाणिज्य कप २०८२ को उपाधि निर्माण व्यवसायी संघले जितेको छ ।
झापाको दमक ५ गोर्खाली टोलमा रहेको विष्ट फुटसलको कोर्टमा भदौ ५ र ६ गते दुई दिन सञ्चालित प्रतियोगिताको फाइनल खेलमा निर्माण संघले मोबाइल व्यवसायी संघलाई ३–० गोल अन्तरले पराजित गर्दै उपाधि कब्जा गरेको हो ।
उक्त प्रतियोगितामा अन्तर वस्तुगत संघको १० वटा टिमको सहभागिता रहेको थियो ।
व्यक्तिगत विधातर्फ निर्माण व्यवसायी संघका दिपेन थापाले उत्कृष्ट गोलकिपरको उपाधि पाउदा मोबाइल व्यवसायी संघका शरण राई हाई स्कोरर भए । त्यसैगरी उत्कृष्ट खेलाडीको उपाधि निर्माण व्यवसायी संघका लेलेन सुब्बाले हात पारे । प्रतियोगिताको अनुशासित टिमको उपाधि फर्निचर व्यवसायी संघले पाए ।
प्रतियोगिताको विजेताले पुरस्कार स्वरूप पहिलो स्थान हासिल गर्ने टोलीलाई नगद ३३ हजार तीन सय ३३ रुपैयाँ सहित ट्रफि पाउदा उपविजेताले नगद २२ हजार दुई सय २२ रुपैयाँ र ट्रफिमा चित्त बुझायो । यता उत्कृष्ट गोलकिपर र हाई स्कोररलाई दुई हजार दुई सय२२ रुपैयाँ प्रदान गरिएको थियो भने उत्कृष्ट खेलाडीको पुरस्कार दुई हजार पाँच सय रुपैयाँ रहेको थियो ।
विजेता तथा उपविजेता खेलाडीहरुलाई समापन समारोहका प्रमुख अतिथि संघका पूर्व अध्यक्ष विजयप्रसाद बराल, वर्तमान अध्यक्ष गोपाल गुराँगाई लगायत अतिथिहरुले पुरस्कार वितरण गरेका थिए ।
