दमक । झापाको दमकमा रहेको लाइफलाइन अस्पतालले थप नयाँ डायलाइसिस मेसिनको एक कार्यक्रमका बीच शुभराम्भ गरेको छ ।
वि.स.२०७८ सालदेखि नै दमकमा मिर्गौला पीडितका लागि डायलाइसिस गर्दै आएको अस्पतालमा विगतमा ६ वटा मेसिनबाट ५२जनाको डायलाइसिस गर्दै आइरहेको थियो ।
सरकारले मिर्गौलापीडितका लागि निःशुल्क उपलब्ध गराउँदै आएको डायलाइसिस सेवाबाट नै उनीहरूको डायलाइसिस गर्दै आएकोथियो । तर थप चारवटा मेसिन जडान गरेपछि अब थप २९ जनाको डायलाइसिस गर्न सकिने लाइफलाइन अस्पताल सञ्चालक समितिसदस्य तथा लाइफलाइन कलेज व्यवस्थापन समितिका अध्यक्ष डाक्टर सूर्यनारायण शाहले जानकारी दिएका छन् ।
उनका अनुसार ६ वटा मात्र मेसिन हुँदा एकजनालाई हप्तामा दुईपटक गरेर ५२ जनाको मात्र डायलाइसिस गर्न सकिन्थ्यो । तर अबचारवटा थपिएपछि थप २९ गरी ८१ जनालाई उपचार गर्न सकिन्छ । अझै पनि ११५ जना बिरामीले नाम टिपाएर पालोको पर्खाइमा छन् ।अझै पनि पालो पर्खनुपर्ने अवस्था त छ नै । तर केही सहज भएको छ ।
दमकमा यो अस्पताल मिर्गौलापीडितका लागि डायलाइसिस गर्ने एक मात्र स्वास्थ्य संस्था भएकोले दमकका बिरामीहरू डायलाइसिसकै लागि बिर्तामोड, विराटनगरजस्ता टाढाका अस्पताल जानुपर्ने बाध्यता रहेको छ । यसकोन्यूनिकरणको लागि अझ व्यवस्थित गर्नु पर्ने तथा दमकका अन्य अस्पतालले पनि डायलाइसिस सेवा सुरु गर्नु पर्ने आवश्यकता रहेको छ ।
अस्पताल सञ्चालक समिति अध्यक्ष बालचन्द्र सुब्बाको अध्यक्षतामा आयोजिय कार्यक्रममा प्रमुख अतिथि दमक नगर प्रमुख राम थापाले लाइफलाइन अस्पताल निजी लगानीको भए पनि नगरबाट गर्नु पर्ने साथ रसहयोग सदैव रहने बताए ।
कार्यक्रममा दमक अस्पतालका मेडिकल सुपरिटेन्डेन्ट डाक्टर कृष्ण शाह, आम्दा अस्पतालका मेडिकल सुपरिटेन्डेन्ट डाक्टर शिखरकट्टेल, रोटरी क्लब अफ दमकका अध्यक्ष केशव अग्रवाल लगायतले शुभकामना मन्तव्य राखेका थिए ।
