दमक । झापाको दमकमा प्रथम पूर्वेली युथ फुटसल प्रतियोगिता हुने भएको छ । पूर्वेली युथको आयोजनामा हुने प्रतियोगिता दुर्व्यसनबाट टाढा रहौं, खेलमार्फत भविष्य उज्यालो बनाऔं‘ भन्ने मूल नारा सहित यही जेठ ४ र ५ गते दुई दिन सञ्चालन हुने बिहीबार पत्रकार सम्मेलन गरी जानकारी दिएका थिए ।
दमक १ भाङबारीमा रहेको स्प एनी फुटसल कोर्टमा हुने प्रतियोगिता युवालाई खेलकुदतर्फ आकर्षित गर्दै लागूऔषध तथा सामाजिक विकृति विसंगतिबाट टाढा राख्ने उद्देश्य सहित आयोजना हुन लागेको अध्यक्ष दिक्षान्त राईले जानकारी दिए । प्रतियोगितामार्फत युवामा अनुशासन, सकारात्मक सोच तथा खेल संस्कृतिको विकास गर्ने लक्ष्य राखिएको छ । साथै खेलकुदमार्फत युवाहरूलाई स्वस्थ, सभ्य र जिम्मेवार समाज निर्माणतर्फ प्रेरित गर्ने उद्देश्यसमेत रहेको छ ।
प्रतियोगिताको विजेताले नगद २० हजार रुपैयाँ सहित मेडल, ट्रफी र प्रमाणपत्र प्राप्त गर्नेछ भने उपविजेताले नगद १० हजारसहित मेडल, ट्रफी र प्रमाणपत्र पाउनेछ ।
विधागत पुरस्कार तर्फ म्यान अफ द टुर्नामेन्ट, बेस्ट गोलकिपर, हाई स्कोरर तथा उदयिमान खेलाडी रहेका छन् ।
