दमक । झापाको दमकमा सम्पन्न प्रथम पूर्वेली युथ फुटसल प्रतियोगिताको च्याम्पियन टिम सिक्स्टीनाइन दमक बनेको छ ।
मंगलबार दमक १ भाङबारी स्थित स्प एनी फुटसल कोर्टमा भएको फाइनल खेलमा एमपिसि ‘ए‘ लाई ३–१ गोल अन्तर पराजित गर्दै सिक्स्टीनाइन विजयी बनेको हो ।
प्रतिस्पर्धात्मक बनेको खेलको दोस्रो मिनेटमा नै विजय राईले गोल गर्दै सिक्स्टीनाइनलाई अग्रता दिलाएका थिए । ७औं मिनेटमा गोलथप्दै लेलेन सुब्बाले टिमको अग्रता दोब्बर बनाए । पहिलो हाफको १०औं मिनेटमा एपिसिका निमा तामाङले गोल गर्दै खेल २–१ को स्थितिमा पुर्याएका थिए ।
विजेता टिम
पहिलो हाफमा एक गोलको अग्रता बनाएको सिक्स्टीनाइनले दोस्रो हाफको अन्तिम समयमा लेलेन सुब्बाको गोलबाट अग्रता दोब्बर बनायो । रोमाञ्चक बनेको फाइनल खेलमा दुवै टोलीले पाएको अन्य अवसर सदुपयोग गर्न नसक्दा खेल ३–१ को अन्तर सकियो ।
व्यक्तिगत विधातर्फ राइजिङ प्लेयर एमपिसिका प्रितम राई घोषित भए भने टिम सिक्स्टीनाइनका आर्यन श्रेष्ठ हाइ स्कोररसँगै प्लेयर अफ द टुर्नामेन्ट चुनिए । यसैगरी विजेता टिमका अनुराग श्रेष्ठले वेष्ट गोलकिपरको उपाधि पाए ।
प्रतियोगिताको विजेताले नगद २० हजार रुपैयाँ सहित मेडल, ट्रफी र प्रमाणपत्र प्राप्त गर्यो भने उपविजेताले नगद १० हजारसहित मेडल, ट्रफी र प्रमाणपत्रमा चित्त बुझायो ।
उपविजेता टिम
विजेता खेलाडीहरुलाई समापन समारोहका प्रमुख अतिथि दमक नगर प्रमुख राम थापा, अतिथिहरु समूहका सल्लाहकार नितेश सिङ्घक, समाजसेवी मनिषा एवाइ लगायतले पुरस्कार वितरण गरेका थिए ।
खेलकुदसँगै लागूऔषध सचेतना कार्यक्रम,सरसफाइ कार्यक्रमहरु गर्दै आइरहेको समूह पूर्वेली युथको आयोजनामा सञ्चालित प्रतियोगिता ‘दुर्व्यासनबाट टाढा रहौं, खेलमार्फत भविष्य उज्यालो बनाऔं‘ भन्ने मूल नारा सहित यही जेठ ४ र ५ गते दुई दिन सञ्चालन भएको थियो ।
युवालाई खेलकुदतर्फ आकर्षित गर्दै लागूऔषध तथा सामाजिक विकृति विसंगतिबाट टाढा राख्ने उद्देश्यसहित प्रतियोगिता आयोजना गरिएको अध्यक्ष दिक्षान्त राईले जानकारी दिए । प्रतियोगितामार्फत युवामा अनुशासन, सकारात्मक सोच तथा खेल संस्कृतिको विकासगर्ने लक्ष्य राखिएको छ । साथै खेलकुदमार्फत युवाहरूलाई स्वस्थ, सभ्य र जिम्मेवार समाज निर्माणतर्फ प्रेरित गर्ने उद्देश्यसमेत रहेको छ।
