माङसेबुङ । माङसेबुङका जनप्रतिनिधिहरुको चिनारी नामक पुस्तक विमोचन हुने भएको छ । जेठ १२ गते मंगलबार साविक बाँझो, इभाङ, गजुरमुखी गाविसबाट २०१९ सालदेखि २०७९ सम्मका जनप्रतिनिधिको विवरण समावेश गरिएको पुस्तक ‘माङसेबुङका जनप्रतिनिधिहरूको चिनारी‘ पुस्तक विमोचन हुने भएको छ ।
उक्त पुस्तकमा २०१९, २०२८, २०३४, २०३९, २०४३, २०४९, २०५४/५५, २०७४ र २०७९ सालमा सम्पन्न विभिन्न निर्वाचनबाट माङसेबङ क्षेत्रमा निर्वाचित भएका जनप्रतिनिधिहरूको विवरण समावेश गरिएको पुस्तकका लेखक राम योङहाङले जानकारी दिएका छन् ।
पुस्तकमा माङसेबुङको राजनीतिक इतिहास, लोकतान्त्रिक अभ्यास र विभिन्न कालखण्डका जनप्रतिनिधिहरूको योगदान बारे संक्षिप्तमा समेटिएको बताइएको छ । माङसेबुङ गाउँपालिका प्रकाशक रहेको पुस्तकले विभिन्न निर्वाचनबाट चुनिएका जनप्रतिनिधिहरूको चिनारी समेटेको छ ।
१४८ पृष्ठको पुस्तकमा ४३ जना जनप्रतिधिको जीवनी, ९८ जना जनप्रतिनिधिको व्यक्तिगत विवरण र ४०३ जना जनप्रतिनिधिको चिनारी समावेश गरिएको हो ।
माङसेबुङ गाउँपालिकाले लिम्बू भाषालाई पालिकाको कामकाजी भाषाका रूपमा कार्यान्वयन घोषणा गर्ने कार्यक्रमको अवसरमा प्रदेश प्रमुख पर्शुराम खापुङको प्रमुख आतिथ्यतामा पुस्तक विमोचित हुने माङसेबुङ गाउँपालिकाका अध्यक्ष हेमन्त राईले जानकारी दिएका छन् ।
