माङसेबुङ । इलामको माङसेबुङमा लिम्बू भाषा सरकारी कामकाजको भाषा बन्ने भएको छ । जेठ १२ गते मंगलबार एक कार्यक्रमकाबिच माङसेबुङ गाउँपालिकाले लिम्बू भाषालाई पालिकाको कामकाजी भाषाका रूपमा कार्यान्वयन घोषणा गर्ने कार्यक्रम रहेको गाउँपालिकाका अध्यक्ष हेमन्त राईले जानकारी दिएका छन् ।
अध्यक्ष राईका अनुसार १२ गते प्रदेश प्रमुख पर्शुराम खापुङको प्रमुख आतिथ्यतामा घोषणा कार्यक्रमसँगै पुस्तक विमोचन तथा सम्मान कार्यक्रमहरु समेत रहेको छ । माङसेबुङमा बहुसङ्ख्यक जनताले बोल्ने लिम्बू भाषा (किरात सिरिजङ्गा लिपि)लाई कामकाजी भाषाका रूपमा कार्यान्वयन गर्नका लागि एक जना भाषिक सहजकर्ता (सहायक पाँचौँ तह) नियुक्त गरिएको छ ।
प्रदेश सरकारले लिम्बू र मैथिली भाषालाई सरकारी कामकाजी भाषाका रूपमा कार्यान्वयनमा ल्याउने तयारी गरिरहेको बेला माङसेबुङले लिम्बू भाषालाई आधिकारिक कामकाजीको भाषाका रूपमा प्रयोगमा ल्याउन लागेको हो ।
माङसेबुङले ‘भाषा, संस्कृति र ललितकलाको संरक्षण र विकास कार्यान्वयन निर्देशिका २०७५’ र ‘माङसेबुङ गाउँपालिकामा करारमा प्राविधिक कर्मचारी व्यवस्थापन गर्नेसम्बन्धी कार्यविधि, २०७४’ अनुसार भाषिक सहजकर्ता नियुक्ति गरिएको प्रमुख प्रशासकीय अधिकृत दिलसेर राईले जानकारी दिए ।
माङसेबुङ गाउँपालिकाको सङ्गठन तथा व्यवस्थापन (ओएनएम)मा नै समावेश गरी भाषिक सहजकर्ता नियुक्त गरिएको उनले जानकारी दिए । भाषिक सहजकर्ताले नेपाली र लिम्बू दुवै भाषामा अनुवादकको काम गर्नेछ ।
राष्ट्रिय जनगणना २०७८ को तथ्याङ्क अनुसार १६ हजार ८१० जनसङ्ख्या रहेको माङसेबुङमा ४२ दशमलव ८३ प्रतिशत लिम्बू र ३३ दशमलव छ प्रतिशत राई समुदाय बसोबास गर्छन् ।
जातीय र भाषिक बाहुल्यताका आधारमा माङसेबुङले २०७५ साल मङ्सिर १३ गतेदेखि ५ नं वडा कार्यालयमा लिम्बू भाषालाई कामकाजी घोषणा गरी लागू गरिसकिएको छ । त्यसै वडामा २०७६ मा एक जना भाषिक सहजकर्ता (सहायक चौथो तह) नियुक्त गरिएको थियो ।
