माङसेबुङ । मैत्रीपूर्ण फुटबल खेलमा इलामको माङसेबुङ शिक्षक टिम(निलो) विजयी भएको छ । इलामको माङसेबुङ ४ सिङफेरे खेलमैदानमा बिहीबार सम्पन्न खेलमा मोरङको मिक्लाजुङ गाउँपालिका शिक्षक टिम(रातो)लाई ५–४ गोल अन्तरले पराजित गर्दै माङसेबुङ विजयी भएको हो ।
माङसेबुङको जितमा अजय लिम्बू र सरतजङहाङ राईले दुई/दुई गोलको योगदान दिए । यसैगरी माङसेबुङको लागि जलन आङ्बुहाङले एक गोल गरेका थिए । उपविजेता बनेको मिक्लाजुङको लागि दिपक राईले दुई गोल गर्दा नरेश राईले समान दुई गोल गरेका थिए ।
यस अघि मिक्लाजुङमा भएको खेलमा मिक्लाजुङले एकका विरुद्ध दुई गोल गर्दै माङसेबुङ माथि जित निकालेको थियो ।
खेलपछी माङसेबुङका टिम क्याप्टेन सरतजङहाङले दुई जिल्लाका पालिकामा रहेका शिक्षकहरुबिच आपसी सम्बन्ध प्रगाढ होस भन्ने उद्देश्यले यो खेलको आयोजना गरिएको बताए । उनी भन्छन– यो अवसरको लागि माङसेबुङका शिक्षक जलन आङबुहाङ र मिक्लाजुङमा अध्यापन गरिरहेका अबोध आङबुहाङलाई विशेष धन्यवाद । यो खेल हारजितको लागि भन्दा पनि आपसी सम्बन्ध सुधार गर्नको लागि हो । यसमा मनोरञ्जन त हुने नै भयो साथै खेलकोअभ्यास समेत हुने गर्दछ । साथसाथै यस्ता प्रतियोगिताहरु स्वास्थ्यको लागि फाइदाजनक रहेको छ ।
