जनकपुरधाम, ५ मंसिर ।
प्रदेश नम्बर २ मा दुई जना मन्त्रीसहित नेकपा (एकीकृत समाजवादी) प्रदेश २ सरकारमा सहभागी भएको छ ।
आइतबार बिहान प्रदेश प्रमुख हरिशंकर मिश्रले नेकपा (एस)का संसदीय दलका नेता सत्रुधन महतो र सांसद प्रमोद यादवलाई मन्त्रीको शपथ गराएका हुन् । मुख्यमन्त्री लालबाबु राउतको सिफारिसमा उनीहरुलाई मन्त्री बनाइएको हो ।
महतोले उद्योग पर्यटन वन मन्त्रालयको जिम्मेवारी पाएका छन भने यादवले कानुन न्याय तथा प्रदेश मामिला मन्त्तालयको जिम्मेवारी पाएका हुन् ।
शपथ ग्रहण समारोहमा मुख्यमन्त्री राउत, प्रदेश सरकारमा भौतिक पूर्वाधार विकास मन्त्री रामसरोज यादव, आन्तरिक मामिला तथा सञ्चारमन्त्री भरत प्रसाद साहलगायत सहभागी थिए ।
प्रदेश नम्बर २ मा अब जनता समाजवादी पार्टी, नेपाली काङ्ग्रेस, नेकपा माओवादी केन्द्र र नेकपा (एस)को गठबन्ध सरकार बनेको छ ।
